ماما كل سنة وانتي طيبة

الساعة 7:30 الصبح
- الو
- الو
- صباح الخير
- صباح النور
- فيه ايه مال صوتك يا ماما
- لا مافيش بس تعبانة شوية .. ممكن تعدى عليا وانت راجع من الشغل
- طيب حاضر .. هاخلص واجيلك

الساعة 3:30 العصر
- الو
- الو .. تعالى يابنى بسرعة
- فيه ايه يا بابا
- ماما .. ماما خلاص

لا .. ماينفعش تموت .. دى طول عمرها واقفة فى ضهرى
ماينفعش تروح منى .. دانا واخد دمى منها
طب والهدية اللى جبتهالها
داعيد الام فاضل عليه 4 ايام

طب بلاش الهدية .. هتمشى كدة وتسيبينى
طب استنى لما اطيب خاطرك اعتذرلك
عن كل مره .. عضيتك فيها فى صدرك وانتى بترضعينى .. وماكنتش عارف انى باوجعك
عن كل مره .. جيت لك من المدرسة بمشكلة ورميتهالك .. وقلت لك اتصرفى
عن كل مره .. زعقت فى وشك عشان مالقيتش لبسى جاهز .. لبسى اللى هالبسه عشان اخرج واسيبك
عن كل مرة .. قمت من على الاكل وقلت لك انا زهقت .. مافيش تغيير
عن كل مرة .. عليت فيها صوتى عليكى .. وخرجت من البيت وقفلت ورايا الباب .. من غير مافكر انتى هتعملى ايه
عن كل مرة .. قلت لك فيها .. ماتتصليش بيا وسط اصحابى .. انا بقيت راجل .. ماتصغرينيش قدام زمايلى
عن كل مرة .. قلت لك فيها .. انا مابقيتش صغير .. ههههههه .. وكأنى انا باكبر وانتى ثابته مكانك
عن كل مرة .. قلت لك فيها .. دى حياتى لو سمحتى ماتدخليش فيها .. ونسيت انى اساسا واخد حياتى منك
عن كل مرة .. زعلتى فيها من الدنيا واللى بتعمله فيكى .. ومافرقش معايا انى اشيل عنك
عن كل مرة .. دموعك نزلت فيها .. وايدى اتشلت انها تمسحها .. وانتى اساسا كنتى بتلحسى دموعى عشان ماتقعش ع الارض
عن كل شعرة سودة اتبدلت بشعرة بيضا .. وماكنتش عارف ان العمر بيجرى بيكى .. وانا باجرى منك

وادينى واقف قدام صندوقك اهو .. مش لاقى جوايا غير ندم .. وكلمة واحدة .. سامحينى

حوار كئيب جداً .. بس مش بعيد انه يحصل لك ..

يا بختك لو لسة تليفون امك ممكن يرن .. وترد عليك .. دا معناه ان لسة فيه فرصة تقول لها
وحشتينى .. بحبك .. ماتزعليش .. سامحينى
يابختك لو لسة تقدر تعدى عليها .. تلاقيها بتفتح لك الباب .. دا معناه انك ممكن تمسك ايديها وتبوسها
تحضنها .. تطبطب عليها .. تضحك فى وشها

فيه غيرك نفسه ان الزمن يرجع .. ويشوف امه ولو يوم واحد .. بس عشان يقول لها .. ماتزعليش

بس حتى اللى امه سافرت من الدنيا اللى احنا فيها دى .. مايزعلش .. قلب الام مضاد للزعل .. ولو راجع ذكرياته .. هيفتكر يوم ما راح يعتذر لها قبل كدة وسمع منها
"هو انا اقدر ازعل منك يا حبيبى .. دانت ضنايا .. هو فيه ام تزعل من ضناها برضه .. روح يابنى ربنا يرضى عليك"

عيد الأم قرب ..
لو هى موجودة .. اعمل معاها زى الساحرة ما عملت مع سندريلا .. لبسها وحطلها ماكياج .. اقفل موبايلك وقول لها دا يومك .. اتصور معاها كتيــــــــــــــــــــر .. ياعالم .. ايه اللى ممكن يحصل بكرة
ولو مش موجودة .. انزل فى اليوم ده .. واعمل اى حاجة تخلى الناس .. يدعوا لها ..
روح خبط على باب ناس غلابة مايعرفوكش .. وقول لهم .. ماما باعتالكم الفلوس دى .. هيدعولها

كل سنة وكل الأمهات بخير

» هل تحب زوجتك وانتي هل تحبين زوجك مثل هؤلاء
» ماما هل الموت مؤلم
» ماما هل الموت مؤلم
» ماما هل الموت مؤلم
» مبروك النجاح وسلم علي ماما