مابقتش عارف أوصف أحساس
وانا ماشى وسط ملايين الناس
أحساسى أنتهيت ... من الأخر بقيت
صوره وخلاص
صوره محصوره بين حراس
الضعف اللى مالينى من على يمينى
وعلى شمالى موتُ الأحساس ..
مابقتش عارف أوصف أحساس .. طعم هزيمه وماضى ببلاش
وحاضر مليان بمرار الكاس .. حتى المستقبل شكلهُ مايسواش
مابقتش عارف أوصف أحساس .. كل الأيام ماشيه وخلاص
بكره زى أمبارح وكله بيتعاش .. ولو البحر اكتفى الانسان مابيستكفاش
تفكيرى وعقلى مبقاش ينفع .. ولا حل أرضى قادر يرفع
كل اللى باقيلى واقع يخدع .. وعالم مؤلم عمال يوجع
تعبت اصالح فالدنيا .. اللى فى يوم مازعلتهاش
وجاى اتلكيك لربى .. واقوله زعلان وخلاص
مابقتش عارف اوصف احساس
مات الانسان وفيه الانفاس
وانا انسان من زمانى ميت
لكن بيك قام وعاش !!!
زعلان منى ولا ازعل منك
كان لازم أصالحك وحاولت
كان لازم ارجعلك وتعبت
لا عرفت ابعد ولا قدرت
ولا دقت راحة فى البعد ..
نفسى اقرب وببعد عنك .. بيقولوا اله ويخافوا منك
وحنانك بيقول ان انت اب .. ودمك بيأكد ان انا ابنك
انا عارف نفسى وعارف أنك .. أكبر من ذنبى حنيه قلبك
أخدت جروحى ورحت لعندك .. ورجعت ذليل مش قادر أقولك
أنى ياربى زعلان منك ..
أنا عارف عصيانى مانا اللى جرحتك .. وكان غرقى فى شرى رد لجمايلك
أدبنى أجرحنى وسنينى حاسبنى .. أى عقاب كلهُ اللا تسبنى
انت شايف ضعفى وانا شايف حبك .. ولازم الأتنين تقابلهم عندك
أصل لوحدى حاولت أندهلك .. سكتنى سكاتى لما ماشوفتش يدك
برايا و جوايا كلى بيصرخلك .. مين انا مين عشان أزعل منك
عشمى فمين ومين يلجألك .. غير المحتاج يتسند على صدرك
مابقتش عارف أوصف أحساس .. لكنى عارف أنك تقدر
تحييى واحد مبقاش يقدر .. حتى انه يقف قدامك
اصلى تعبت من التفكير .. ولا مليون حل ولا تفسير
مافضلشى عندى غير ايمانى .. وانك تقدر تعيد بنيانى
الكلمه من فمك تغفر .. الأمر كله بسلطانك
والأمر يخرج من عندك .. ومفيش كلام بعد كلامك
مفيش كلااااااااااااااام بعد كلامك
وهاستنى ياربى تانى سلامك
تحوط عليا بامانك
حضنك يجى يحمينى
وايدك الحانيه تبنينى
وتستر عليا وتعفى
ولكل اثامى تمحى
هاتفضل عينى مرفوعه اليك
هاهرب من نفسى واجرى عليك
لاخر العمر الأمل فيك
الأحد مارس 15, 2015 2:03 pm من طرف ميرولا
